Эрдэнэт үйлдвэр 1991 онд Ус шүүн цэвэршүүлэх зориулалттай Элсэн шүүрийн байгууламжийг ашиглалтад оруулжээ. Энэ үеэс өнөөг хүртэл тасралтгүй үйл ажиллагаа явуулж, улмаар 6 жилийн өмнөөс байгууламжийг шинэчлэх ажлыг эхлүүлсэн байна. Түүнчлэн үйлдвэрийн Ус хангамжийн цехийн цэвэрлэх байгууламжийн хэсгийн хамт олон энэ сарын 1-ээс элсэн шүүрийн байгууламжийн хоёр шүүрийг шинэчлэх ажлыг эхлүүлсэн аж. Монгол Улсын хэмжээнд ус ариутган цэвэршүүлэх үндсэн үйл ажиллагаатай цэвэрлэх байгууламжууд дунд энэ төрлийн элсэн шүүрийн байгууламжтай аймаг Эрдэнэтээс өөр байдаггүйг мэргэжилтнүүд онцлов. Элсэн шүүр нь бохир усыг 92-96 хувь хүртэл цэвэршүүлэх чадалтай, технологийн өндөр ач холбогдолтой дамжлага тул элсэн шүүрт иж бүрэн засвар үйлчилгээ хийснээр ашиглалтын хугацаа уртсаж 30 жил тасралтгүй, найдвартай ажиллах нөхцөл бүрдэх юм. Энэ талаар Ус хангамжийн хэсгийн Цэвэрлэх байгууламжийн хэсгийн дарга Д.Буйдан: “Цэвэр усыг зүй зохистой хэрэглэх нь цэвэршүүлэх, ариутгах ажиллагаанд чухал нөлөөтэй. Эрдэнэт хотын нийт хүн ам, аж ахуйн нэгж, албан байгууллагын өдөр тутмын хэрэглээнээс гарч байгаа бохир усыг цэвэршүүлэх энэ ажилд Ус хангамжийн цехийн Цэвэрлэх байгууламжийн хэсгийн 70 гаруй ажилтан, ажилчид ажиллаж байна. Тус хамт олон энэ оны тухайд лагийн талбайд лаг боловсруулах ажлыг эрчимжүүлэн, боловсруулсан шимт хөрсийг мод үржүүлгийн талбайд ашиглахад гар бие оролцсон. Манай аймгийн хувьд бохир ус нийлүүлдэг томоохон газрууд нь хивсний болон мах боловсруулах үйлдвэр байдаг. Тус байгууллагуудтай хамтран ажиллаж, байгаль экологид сөрөг нөлөө багатай ус нийлүүлэх ажилд онцгойлон анхааран ажиллаж байна” гэв.
Нийт 0