БОАЖ-ын сайд Д.Сарангэрэл өнөөдөр “Жайка” ОУБ-ын Монгол дахь Төлөөлөгчийн газрын дарга Тамүра Эриког хүлээн авч уулзлаа. Уулзалтаар “Жайка” олон улсын байгууллагатай хэрэгжүүлж ирсэн хамтын ажиллагааны талаар болон цаашид харилцан ашигтай хамтын ажиллагааг өргөжүүлэх чиглэлд ямар нөөц боломж байгаа талаар санал солилцсон юм. Байгаль орчин, аялал жуулчлалын салбарт 1994 оноос хойш Буцалтгүй тусламжаар 4, техникийн хамтын ажиллагааны хүрээнд 3, хөгжлийн судалгааны 3 төслүүд хэрэгжээд байна. 
“Жайка” ОУ-ын байгууллагын Монгол дахь төлөөлөгчийн газрын дарга Тамүра Эрико: “Би сар бүр 2-3 удаа хөдөө явж амардаг. Энэ үед үргэлж анзаарагддаг нэг зүйл нь хогны асуудал байдаг. Хогийг хогийн саванд хаях ёстой гэсэн ухамсарыг иргэн бүрт суулгах, байгаль дэлхий, хүрээлэн буй орчноо хайрлан хамгаалах чиглэлд хийх ажил их байгааг эндээс хардаг. Энэ утгаараа аялал жуулчлалын салбарт иргэдийг соён гэгээрүүлэх, зөв аялаж сургах, тэр дундаа хогны асуудалд шийдэл олоход манай байгууллага хамтран ажиллахад бэлэн байгаагаа хэлмээр байна. Түүнчлэн бид байгаль орчны таван гол асуудалд түлхүү анхаарал хандуулан ажиллаж байна. Тухайлбал, агаарын бохирдол, хогны асуудал, усны бохирдол, байгаль хамгаалал, уур амьсгалын өөрчлөлт зэрэг асуудлуудыг багтаасан. Энэ хүрээнд БОАЖЯ-тай хамтран ажиллах олон нөөц,боломжууд байгаа гэж үэзж байна.” гэдгээ онцолсон юм.
БОАЖ-ын сайд Д.Сарангэрэл: “Миний хувьд тантай санал нэг байна. Таны дурьдсан манай салбарын асуудлууд нь Засгийн газрын үйл ажиллагааны хөтөлбөрт багтсан байгаа. Монгол улс анх удаа эдийн засгийн тэргүүлэх чиглэлдээ аялал жуулчлалын салбарыг тодорхойлсон. Монголчуудад үзэсгэлэнт байгаль болон түүх, соёлын гайхалтай өв байдаг. Одоо харин аялал жуулчлалын салбарын соёлыг хөгжүүлэх, үйлчилгээг сайжруулахад анхаарах шаардлага байгаа. Энэ асуудалд бид та бүхний санал, санаачилгийг бүх шатандаа дэмжин, хамтран ажиллах болно.” Гэсэн юм.
Нийт 0