“Жи тайм” гэх пирамид тогтолцоотой сүлжээний бизнес эрхлэн 12.000 иргэнд 22 тэрбум төгрөгийн хохирол учруулсан хэргийн мөрдөн байцаалтын ажиллагаа дуусч, иргэдийн хохирлыг барагдуулах чиглэлээр ажиллаж эхэлсэн байна.
Уг хэргийг Казахстан улсын иргэн М.Марат зохион байгуулалттайгаар үйлдсэн болох нь мөрдөн байцаалтын шатанд нотлогдож, улмаар яллагдагчаар татан шалгаж байх хугацаанд оргон зайлсан байдаг.
Иймд түүнийг манай улстай эрхзүйн харилцан туслалцаа үзүүлэх гэрээтэй улс орнуудад хамтран ажиллах санал хүргүүлж, интерполын чиглэлээр эрэн сурвалжилж байгаа ч хараахан үр дүн гараагүй байгаа юм.
Мөрдөн байцаах албанаас М.Маратын “Хаан” банкны дансан дахь 6.9 тэрбум төгрөг, Монгол Улсын хилээр орж ирсэн 400 сая төгрөгийн зургаан автомашин, 4.1 тэрбум төгрөгийн үнэ бүхий 76 329 ширхэг бараа хураан авч, битүүмжилсэн байгаа тухай мэдээлсэн.
Дээрх битүүмжилсэн эд зүйлсийг мөрдөн байцаалтын шатанд, нөхөн төлүүлэх талаар дүүргийн шүүх, Улсын Дээд шүүх, нийслэлийн прокурорын газар болон Улсын ерөнхий прокурорын газар руу санал хүргүүлсэн аж.
Хэргийн холбогдогч оргон зайлсан учраас битүүмжлэгдсэн эд хөрөнгийг хохирогч нарт олгох эрх зүйн орчин бүрдэхгүй байгаа тул Ж.Мараттай хамт хэрэгт холбогдсон Монгол Улсын иргэн А.Н-ыг эзэмшигчээр тогтоон, битүүмжилсэн хөрөнгөөр хохирсон иргэдийн хохирлыг барагдуулахаар ажиллаж эхэлсэн байна.
Нийт 0